كتب "ديف كيربن" في موقع "لينكد إن" 16 نقطة مهمة تفرق بين الناس النتجحة والغير ناجحة:
1- تهتم بالتغيير مقابل تخاف التغيير
التغيير يعتبر من أصعب الحاجات اللي ممكن الإنسان يعملها. في ظل الظروف اللي إحنا عايشنها وإزاي العالم كله بيتغير من حولنا والتكنولوجيا سرعت كل حاجة بصورة كبيرة، أصبح علينا إننا لازم نتكيف مع الواقع ونستعد للجاي بدل ما ننكر ونخاف ونستخبى.
2- عايزين غيرهم ينجح مقابل تمني الفشل للاخرين في صمت
لما تكون بتشتغل في شركة مع فريق عمل، علشان تكون أنت شخصياً ناجح لازم الفريق كله يكون ناجح. لو أنت من جواك مش عايزهم ينجحوا، يبقى بتشتغل معاهم ليه!
3- الفرح مقابل الغضب
في الحياة العملية والشخصية، من الأفضل إن الإنسان يكون سعيد وينقل الإحساس ده لباقي الناس. لأن ببساطة السعادة معدية والناس لما بتشوفك سعيد بيتشجعوا أكتر إنهم يشتغلوا وهما مبسوطين، وبالتالي بينعكس ده على تركيزهم في الشغل ونجاحهم والشركة. على الصعيد الاخر، الغضب بيخلي كل اللي حواليك بيشتغلوا في ذعر وخوف وغير متحمسين، وبالتالي بيأثر ده على تقدم الشركة.
4- تحمل مسؤلية الأخطاء مقابل لوم الاخرين عليها
طول ما فيه صعود أكيد فيه هبوط، كونك قائد ناجح يخليك تتحمل مسؤلية أخطائك، لأن لوم الاخرين مش هيحل حاجة، بل بالعكس هيخلي الناس محبطة وده مش مفيد للشركة نهائياً.
5- تتكلم عن الأفكار مقابل تتكلم عن الناس
اتعلمنا في حياتنا إن الكلام عن الناس (النميمة) مش بيقدم ولا يأخر، ومعظمه غير صحيح وسلبي. الناس الناجحة، بدل ما بتضيع وقتها في الكلام عن الغير، بيستثمروا وقتهم في مناقشة الأفكار اللي بتخلينا نطور نفسنا والشغل.
6- مشاركة المعلومات مقابل كتمها
"المشاركة تعني الإهتمام." في حياتنا الإجتماعية والمهنية، المشاركة جانب أساسي للنجاح. لما بتشارك الناس في اللي أنت بتعمله عن طريق نشر اللي أنت تعرفه، بيخلي الناس تتفاعل معاك وتساعدك بمعلوماتهم وبالتالي بتنجح أسرع. من صور الأنانية وضيق الأفق حجب المعلومات.
7- إعطاء كل ذي حق حقه مقابل أخذ حقوق الغير
العمل الجماعي أساس النجاح. لما تشتغل مع الغير، خلي شغلك الشاغل إنك تدي الفضل لأصحاب الأفكار الجيدة. ده هيحفزهم على التفكير في تحسين أداء العمل وتطويره وبالتالي نجاح الشركة.
8- تحديد أهداف وخطط للحياة مقابل الحياة بدون أهداف
من المؤكد أنك مش هتنجح إلا لما تكون محدد وجهتك في الحياة. يفضل يكون عندك "لوحة رؤية الحياة" وتشمل: 10 سنين خطة طويلة واضحة عايز تروح فين، 3 سنين خطة قصيرة، خطة إستراتيجية سنوية، وأهداف يومية. كتابة رؤيتك وخططك على الورق هيساعدك على الالتزام بيهم وتنفيذهم.
9- احتفظ بنوتة معاك مقابل اعتمد على الذاكرة
لو فيه نوتة دايماً معاك بيساعدك إنك تكتب أفكارك باستمرار بدل ما تعتمد على ذاكرتك وفي النهاية هتنسى الفكرة وممكن تضيع عليك فرصة بسبب نوتة. اكتب دايماً أفكارك قيل ما تنساها، حتى لو على الموبايل وبلاش تقول "لا أنا هفتكر!"
10- القراءة يومياً مقابل مشاهدة التلفيزيون
القراءة يومياً بيعلمك حاجة كل يوم. سواء بتقرأ مدونة (زي المدونة دي)، مجلة، أو كتاب هيزود معلوماتك. كل لما تقرأ أكتر كل ما ثقافتك هتتوسع. مشاهدة التلفيزيون على الجانب الاخر أداة ترفيه أو هروب، من النادر جداً إنك تستفيد من التلفيزيون.
11- منظور التغيير مقابل منظور العمل
قادة التغيير مش بس بيركزوا على النجاح لوحده، ولكن بيحاولوا يوصلوا للمستوى التاني. قادة التغيير شغلهم الشاغل بناء فريق عمل قوي، تحفيزهم، وخلق روح التعاون بينهم. قادة التغيير دايماً بيتطلعوا إنهم يتغيروا للأحسن، ومش بس هما، كمان فريق العمل بتاعهم. زي ما بيركزوا على المبيعات والمكسب، كمان همهم إنه يكون عندهم فريق عمل فريد من نوعه.
12- بتعلم باستمرار مقابل "أنا عارف"
التعلم باستمرار هو الطريقة الوحيدة للنمو العقلي والذهني. التعليم هيخليك مطلع على حاجات كنير وبالتالي سابق منافسينك دايماً.في حين لو أنت عارف كل حاجة، كما يدعى البعض، مش هتعرف حاجة وهتضيع عليك فرص كتير.
13- مدح الاخرين مقابل نقدهم
مدح الشخص طريقة فعالة بتبين له إنك مهتم بيه. المدح، ولو بسيط، بيزود الطاقة الإيجابية عند الشخص الممدوح وفي نفس الوقت بتحسسك بنوع من الإحسان في قلبك. على الجانب الاخر، نقد الاخرين بيرفح السلبية ومالوش أي فايدة تذكر.
14- المسامحة مقابل الإنتقام
إحنا بشر، وده معناه إننا بنخطأ. الطريقة المثلى إننا نعدي الخطأ بالمسامحة والاستمرار. الغضب والإنتقام هيزد الأمور سوء، ليك أنت مش لحد تاني.
15- عمل قائمة "عايز أكون" مقابل سيبها على الله
قائمة "عايز أكون" مهمة علشان تعرف تخطط لحياتك. عايز أكون مدير شركة، عايز أكون أب زوج ناجح، عايز أكون أب مثالي ... الناس اللي مش ناجحة مش عارفة هي عايزة تعمل إيه في حياتها. لو أنت مش عارف عايز تبقى إيه هتوصل لإيه وإزاي؟ أقعد مع نفسك شوية دلوقتي وفكر .. عايز تبقى إيه؟؟
16- الشكر مقابل عدم التقدير
الشكر من أهم صفات الناس الناجحين. أولاً هيخليك تقدر النعم اللي أنت فيها، ثانيا هيحسن علاقتك بالناس كنير، لأن لو فكرت هتلاقي فيه ناس كتير ليها أفضال عليك لازم تشكرهم. الشكر من مفاتيح النجاح في الحياة.
ليست هناك تعليقات:
اكتب تعليق