كل واحد فينا عنده القاموس الشخصي بتاعه، يعني إيه؟ يعني إحنا مختلفين في: التربية، في الثقافة، في العادات، في فهم الدين، في فهم الأشياء .. وهكذا. وبالتالي مع الوقت ولما كبرنا كل واحد كوّن معاني معينة لكل حاجة حوليه هو شخصياً.
وده أثّر على سقف توقعاتنا في التعامل مع الأشخاص والمواقف، زي مثلاً: في العزومات العائلية، فيه ست بيت لازم لما تروح البيت تاني يوم تتصل على ست البيت التانية (صاحبة العزومة) وتشكرها على العزومة، لو ماحدش عمل كدة معاها هي شخصياً ممكن تقول عليه قليل الذوق.
مثال آخر: واحدة قراءة فتحتها قريب وتكون متوقعة إن العريس هيجيب معاه خاتم أو دبلتين علشان هى شافت ده قبل كدة في السوشيال ميديا أو واحدة صاحبتها حصل معاها كدة ... وهكذا، وبالتالي توقعتنا بتأثر على جميع علاقاتنا بالسلب أو الإيجاب.
الإختلاف في حد ذاته كويس ومفيش فيه مشكلة. المشكلة بتظهر لما ما أخدش اللي أنا متوقعه أو اللي أنا عايزه. ولكن السؤال المهم هنا:
هو إيه اللي أنا عايزه؟
وده سؤال مهم جداً، لأن أوقات كتير بنبقى مش عارف أنا عايز إيه أو لو عارف مش بنقل ده للطرف التاني سواق صديق أو زميل أو زوج أو زوجة وده المهم لأن هى دي العلاقة اللي بيحصل فيها مشاكل كتير بسبب الموضوع ده.
يعني مثلاً: تسأل زوجة "حضرتك محتاجة إيه في العلاقة؟" ممكن تقول حب ودعم وأمان. السؤال اللي بعده مهم قوي: "إيه صور الحب والدعم والأمان بالنسبة ليكي؟" يعني جوزك يعمل إيه علشان تحسي بالحب والدعم والأمان؟ ممكن تكون هى عارفة الإجابة وممكن تكون مش عارفة! زي مثلاً كلمات "المودة والرحمة" اللي دايماً ينسمعهم، فيه ناس كتير مش عارفين يعني إيه أو مفهوم الكلمتين مختلف من شخص لآخر!
كذلك الزوج، ممكن تسأله: "حضرتك محتاج إيه في العلاقة؟" ممكن يقول حنان وإحتواء وتقدير. مرة اخرى: "إيه الحاجات اللي زوجتك تعملها أنت تحس بالحنان والإحتواء والتقدير؟"
وهنا لما كل طرف يبوح باللي هو عايزه لما ما يتناسب مع قاموسه الشخصي يحصل تحقيق للرغبات، ويتخلق قاموس جديد للعلاقة دي وتمشي في مسارها الصحي.
إيه المطلوب مننا؟
طلّع ورقة وقلم واكتب أنت محتاج إيه في العلاقة وترجم كل الحاجات دي إلى أفعال يعملها الشخص التاني وخليه هو/هى كمان يعمل كدة، يكتب هو/هى محتاج منك إيه في العلاقة وبعدين تبادلوا الأوراق واتفقوا على القاموس الجديد للعلاقة. ولو مش عارفين تعملوا كدة شوفوا طرف تالت متخصص يساعدكم.
اتفرج على الفيديو هنا
ليست هناك تعليقات:
اكتب تعليق